Драматични снимки од Брач, необична појава на небото над жариштето: Пожарот е уште активен, во тек е евакуација од заливот Маслинова/видео

Силниот ветер повторно го разгоре пожарот на Брач ​​и го прошири на нови подрачја.

Од заливот Маслинова, каде што се наоѓа рибникот „Сардина“, пристигнаа драматични снимки од пожарот и чадот што се шири под влијание на ветерот, пренесува „Далмација Данас“ (Dalmacija Danas).

Снимките ја откриваат сериозноста на ситуацијата на терен; поради опасноста, луѓето од рибникот се евакуирани.

Големиот пожар на Брач ​​создаде уште една впечатлива глетка. Над местото на пожарот се издигна пирокумулус – голем облак што може да се формира поради силно загревање на воздухот.

Пожарникарите продолжуваат да се борат со огнената стихија што избувна доцна во четвртокот вечерта меѓу Ложишќа и Грабовица на Брач, настојувајќи да го запрат пожарот што се движи кон пустиножителскиот манастир Блаца и населбата Милна. Утринава пристигнаа авиони „Канадер“ за да помогнат во гаснењето.

Никола Мартиниќ Драган, командант на оперативната противпожарна зона на Брач, за емисијата „Утринска хроника“ на Хрватското радио изјави дека состојбата на теренот е подобрена во споредба со ноќта. „Имаше неколку објекти во опасност кои успеавме да ги одбраниме; активно се фокусиравме на заштита на манастирот Блаца и населбата Милна, која во моментов не е загрозена. Го потиснуваме пожарот кон морето, а на теренот моментално има околу сто пожарникари“, рече Никола Мартиниќ Драган.

„На теренот има 136 пожарникари и 36 возила; тие го запреа напредувањето на пожарот кон Грабовица и се прегрупираа за да го спречат ширењето на огнот кон манастирот Блаца и населбата Милна“, соопштија од оперативниот центар за гаснење пожари за агенцијата „Хина“, кратко пред полноќ. Тие наведоа дека куќите и станбените објекти не се загрозени.

„Во моментов нема потреба од евакуација на населението“, соопштија од оперативниот центар утрово.

Се проценува дека изгореле околу 3.000 хектари шума и ниска вегетација. Главниот пожарникарски командант Славко Туцаковиќ нареди упатување дополнителни интервентни противпожарни единици од Дубровник и Шибеник, како и итни засилувања од противпожарните здруженија на Задарската и Шибенско-книнската жупанија, кон местото на пожарот на островот Брач.