Драма на Дунав: Брод полн со патници се заби во ѕид во Виена, повредени 14 лица

Четиринаесет лица беа повредени утрово околу четири часот кога луксузен речен крузер удри во ѕид на Дунав во Виена. Виенската противпожарна служба пристигна на местото на несреќата за неколку минути, со голем број спасувачи на брегот и на реката. Пожарникарите ја пребаруваа реката за да пронајдат евентуално паднати патници и дали бродот претрпел штета под водената линија, објави Хојте.

Бидејќи бродот бил неколку метри под нивото на брегот, пет лица биле евакуирани со помош на возило со скали, додека двајца други биле пренесени на брегот со противпожарен чамец.

Меѓу патниците бил и германски болничар кој, дури и пред да пристигне брзата помош, почнал да им пружа прва помош на повредените и ја проценил ситуацијата на бродот.

Според портпаролот на виенската брза помош, Даниел Мелхер, вкупно 14 лица биле повредени, од кои шест биле однесени во болница со полесни повреди. Неколку екипи за итни случаи, вклучувајќи и специјална единица, учествувале во интервенцијата.

Останатите патници биле префрлени на друг брод за да го продолжат своето патување.

Причината за судирот сè уште не е позната. Истражителите утврдуваат дали несреќата е предизвикана од технички дефект, грешка во управувањето или некоја друга причина.