Дојче веле: Што би значел падот на Орбан за Вучиќ?

Унгарија, предводена од премиерот Виктор Орбан, е еден од клучните сојузници на Србија во рамките на Европската Унија (ЕУ), додека српскиот претседател Александар Вучиќ се соочува со сè поголеми критики од Брисел за она што наводно се репресивни потези и отстапување од демократските стандарди, пишува Дојче Веле (DW).

Според проценките што ги објави DW, Вучиќ нашол политичка потпора во Унгарија, додека тој и Орбан сè повеќе се сметаат за лидери чии политики ги поткопуваат фундаменталните вредности на ЕУ. Во исто време, обете земји се етикетираат во некои анализи како платформи за руско и кинеско влијание во Европа, иако постојат и значителни разлики во политичките позиции меѓу Белград и Будимпешта.

„Братство во авторитаризмот“

Орбан е фокусиран на антимиграциските политики и противењето на воената помош на ЕУ за Украина, додека Србија, иако формално е кандидат за членство во ЕУ, одржува различен пристап и, според DW, дури и испорачува одредено оружје за Украина. Сепак, аналитичарите истакнуваат дека тие се поврзани со сличен модел на управување и наратив за заштита на државниот суверенитет.

Александар Попов, директор на Центарот за регионализам во Нови Сад, смета дека ова е „братство во авторитаризам“ и заедничко отстапување од европските вредности, при што Орбан работи во рамките на ЕУ, а Вучиќ надвор од неа.

„Првенствено станува збор за лични односи кои траат колку и политичките пријателства“, рече Попов, додавајќи дека односите можат брзо да се променат ако дојде до промена на владата.

Сличен став изразува и Душко Лопандиќ, претседател на Форумот за меѓународни односи, кој смета дека доаѓањето на СНС на власт во Србија довело до зајакнување на политичките и економските врски со Унгарија, особено во банкарскиот и енергетскиот сектор.

Според него, Унгарија со тоа добила значително влијание во Србија, додека политичката поддршка на Будимпешта за Белград била важна и во односите со Европската Унија.

Политички прагматизам и лични интереси

Аналитичарите, исто така, проценуваат дека евентуалната промена на владата во Унгарија и доаѓањето на опозицискиот политичар Петер Маѓар би можеле да имаат директни последици за Србија, вклучително и слабеење на меѓународната позиција на Александар Вучиќ и односите со Алијансата на војводинските Унгарци (SVM).

Лопандиќ предупредува дека евентуалниот пораз на Орбан на изборите во недела би претставувал сериозен политички удар за Вучиќ, додека Попов проценува дека тоа би имало и силен психолошки ефект во регионот, како сигнал дека дури и долгогодишните влади можат да бидат отстранети.

Во случај Орбан да остане на власт, соработката меѓу Белград и Будимпешта, според соговорниците на DW, веројатно би продолжила, но со изразена доза на политички прагматизам и лични интереси.

Аналитичарите заклучуваат дека односот меѓу Орбан и Вучиќ не може да се сведе само на идеолошки врски, туку на комбинација од политички прагматизам, економски интереси и лични односи, со постојани тензии меѓу Брисел и двајцата лидери поради обвинувања за демократска регресија.