Договорот меѓу Иран и САД е блиску, само уште три прашања чекаат расплет!

Преговорите меѓу САД и Иран се на прагот на историски договор. Оваа информација ја пренесе Ал Џезира, која нагласува дека се забележува значителен напредок во преговорите, особено кога станува збор за нуклеарната програма на Иран и обидот за смирување на конфликтот што одзеде многу животи.

Пакистанските власти тврдат дека размената на пораки меѓу Вашингтон и Техеран дала конкретни резултати, намалувајќи ги разликите што претходно ги блокираа преговорите во Исламабад.

Дополнителен импулс на процесот доби пристигнувањето на високо рангирана пакистанска делегација во Техеран, предводена од командантот на армијата Асим Мунир.

Иранскиот министер за надворешни работи, Абас Арагчи, ја прими делегацијата и им се заблагодари за, како што е наведено, отворената комуникација и медијацијата. Посетата има за цел подготовка на нова рунда разговори.

Ал Џезира наведува дека интензивно се спроведува „дипломатија преку посредници“ и дека најголемо внимание се посветува на ограничувањето на збогатувањето на ураниумот и судбината на околу 440 килограми високо збогатен материјал.

„Знаеме дека обете страни се заглавени на опсег помеѓу пет и 20 години забрани за збогатување, а решението е некаде на средина. Постојат неколку опции за 440-те килограми ураниум – од испраќање во странство до трета страна, до негово осиромашување до природна форма до три проценти“, рече Бин Џаваид.

Се разгледуваат и голем број опции за постојните залихи на ураниум, вклучително и преместување во трети земји или разредување на пониско ниво.

Според дипломатски извори, Пакистан би можел да игра клучна улога во зближувањето на двете страни.

По неуспешните разговори во Исламабад, медијаторите сега се обидуваат да ги усогласат ставовите за три чувствителни прашања: нуклеарната програма на Иран, контролата на Ормутскиот теснец и можните воени репарации.

Конфликтот што започна на 28 февруари меѓу САД и Израел имаше сериозни последици, додека тензиите се проширија и во други делови од регионот, вклучувајќи ги Либан и Заливот.

Во меѓувреме, Пакистан спроведува паралелна дипломатска офанзива преку посети на неколку регионални престолнини, со цел да се спречи саботажа на евентуален договор од страна на разни политички и воени актери.

Трамп: „Крајот на конфликтот е близу“

Претседателот на САД, Доналд Трамп, изјави дека светот има „многу важни денови“ пред себе и дека крајот на конфликтот со Иран е „многу близу“.

Белата куќа потврди дека разговорите во Пакистан биле оценети како продуктивни и дека следната рунда би можела да се одржи во Исламабад. Иранската страна, исто така, потврдува дека значителен број пораки биле разменети преку Пакистан.

Сепак, ситуацијата останува кревка. Американските поморски активности во областа на Ормускиот теснец продолжуваат да предизвикуваат тензии, додека Техеран ги смета овие потези за кршење на претходните договори.

Иранската страна предупредува дека понатамошната ескалација би можела да доведе до сериозни последици за поморскиот сообраќај во регионот, објавува Ал Џезира.