Во тек се градежните активности за целосна реконструкција на паркот „Жена борец“. Од Град Скопје информираат дека реконструкцијатао пфаќа замена на постојните подни плочки и пешачки патеки со мермерни, кои ќе му дадат поубав и поблагороден изглед на просторот, во склад со неговото значење и местоположбата.
– Истовремено, се реставрира постојната урбана опрема, а со дополнително хортикултурно уредување, ќе се збогати зелената слика на паркот. Претходно, повторно засвети Вечниот оган кај фонтаната, кој во минатото не беше во функција – соопштија градските власти.
Скопскиот градоначалник, Орце Ѓорѓиевски, кој изврши увид во активностите, истакна дека паркот „Жена борец“ е едно од оние места каде што се среќаваат зеленилото, спомените и историјата.
– Место за одмор од градското секојдневие, за средби и за прошетки, кое заслужува да биде уредено и негувано, со внимание кон секој детаљ. Токму затоа, во тек е негова целосна реконструкција. Грижата за Скопје е наш приоритет и секојдневна одговорност – изјави Ѓорѓиевски.
Тој додаде дека продолжуваат активностите за обновување и за редовно одржување на постојните паркови, но и за подигнување нови зелени површини, за повеќе простор за одмор, дружење и уживање на сите генерации.
