Бојана Скендеровски ексклузивно со концерт во Тетово – вечер што ќе се памети, со глас што се чувствува!

Ако ги знаете народните македонски песни „Распукала Шар Планина“ и „Мала ќе ти е Шар Планина“, тогаш ќе се согласите со нас дека така ќе биде во Тетово на 22 мај, кога со своето моќно ангелско пеење ќе загрми популарната поп-пејачка Бојана Скендеровски. Неа ја знаеме и како успешна водителка на ТВ-емисијата „Улица Македонија“, која траеше цели четири сезони. А, овој концерт навистина ќе биде коктел од убавина, бидејќи ќе биде еден ден по верскиот празник Спасовден.Бојана, со почеток во 20:00 часот, на сцената на Домот на културата „Иљо Антевски-Смок“, ќе ни ги испее сите свои хитови што ги има снимено во поп-музиката. Концертот се одржува под мотото „Глас што се чувствува, вечер што се памети“.

Публиката ја очекува вечер исполнета со прекрасна музика, искрени емоции и со песни што оставиле белег низ годините. Бојана подготвува концерт што нема да биде само класичен музички настап туку и емотивна музичка средба со публиката, која секогаш ѝ враќа со љубов. Секое ракоплескање по испеана песна е дел од едно особено доживување.

– Многу сум нестрплива да запеам и во Тетово, по оние мои прекрасни солистички концерти во Скопје и во Штип. Како на тие концерти така и на овој, тетовскиот, ќе ѝ ја пренесам мојата позитивна енергија на публиката, нешто што сум сигурна дека ќе се памети – вели расположената Бојана за весникот ВЕЧЕР.

–Картите се по симболична цена од 400 денари, за да бидат достапни за секого, во продажба се, а бројот на места во салата е ограничен. Исто така, ќе ја видиме снимката од концертот на малите ТВ-екрани, во еден од наредните соодветни термини. Останува да уживаме во убавите песни со нашата распеана Бојана.

(Д. Миќиќ)