Коосновачот на „Мајкрософт“, Бил Гејтс, верува дека вештачката интелигенција на крајот би можела да биде одговорна за „милијарда смртни случаи“, рече тој во интервју емитувано денес, повикувајќи на регулирање на технологијата.
„Вештачката интелигенција е секако доволно моќна за да предизвика настани што предизвикуваат милијарда смртни случаи“, изјави тој за „Ен-би-си“ кога беше прашан дали смета дека вештачката интелигенција е доволно моќна за да го уништи целото човештво.
„Никогаш не постоело оружје толку моќно како комбинацијата на злонамерни актери и најновите алатки за вештачка интелигенција што им се на располагање“, изјави американскиот милијардер.
„Никој не мисли дека саморегулацијата е доволна“, одговори тој кога беше прашан дали се потребни закони за регулирање на вештачката интелигенција.
„Агенциите за спроведување на законот и креаторите на политики треба да се вклучат во дискусијата за тоа како треба да изгледаат заштитните мерки и надзорот“, додаде тој.
Дебатата за регулирањето на вештачката интелигенција доби нов моментум откако водечките компании – вклучувајќи ги „ОпенВИ“, креаторот на „четџипити“, и „Антропик“ (Anthropic) ја објавија својата подготвеност да го забават развојот на технологијата по серијата хакерски инциденти со висок профил кои привлекоа значително внимание од јавноста, пренесе „Хина“.
