Би трчал гол од Лондон до Кардиф само да ја освојам светската титула

Еден од најдобрите снукер играчи, Велшанецот Марк Вилијамс, изјави дека би трчал гол по автопатот од Лондон до Кардиф ако ја освои четвртата светска титула во Шефилд. Тој беше светски шампион во 2000, 2003 и во 2018 година, кога вети дека ќе се соблече пред прес-конференцијата ако триумфира. Тој го победи Џон Хигинс со 18:16 во финалето, а на прес-конференцијата по натпреварот се појави само со пешкир.

• Би направил сè за да освојам уште една титула, но годините минуваат и шансите да ја освојам се сè помали. Би трчал гол по автопатот од Лондон до Кардиф само да ја освојам светската титула – рече 51-годишниот Вилијамс.

Вилијамс загуби со 12:18 од Жао Синтон во финалето минатата година, станувајќи првиот кинески и азиски светски шампион.

Тој стигна до финалето и покрај влошувањето на видот, поради што беше потребна операција за замена на леќите.

• Ако тргне наопаку, готово е. Тоа е единственото нешто што ме спречува. Разговарав со Ентони Хамилтон (поранешен играч), кој имаше иста операција и одблесокот од телевизиските светла му ја уништи кариерата. На крајот ќе имам операција на очите, но дали оваа година, следната година, не знам – додаде Вилијамс.

По турнирот во Манчестер претходно оваа година, тој рече дека се бори и со ненадејно и необјаснето губење на способноста за изведување одредени вештини.

• Малку е загрижувачки. Во моментов сум параноичен… Не е баш најдобро, но ми треба малку вежбање за да се ослободам од тоа. Не вложувам доволно труд. Ќе се обидам да тренирам напорно до Светското првенство за да го вратам времето – додаде Вилијамс.

Тој стана најстариот рангиран играч минатата година со 50 години и 206 дена, кога ја освои гран-при титулата. Тој моментално е рангиран на шестото место во светот.

Инаку, Светското првенство започнува денеска, во Шефилд, а Вилијамс ќе игра против 22-годишниот полски играч Антони Ковалски, во првото коло.

• Сè уште се борам. Сè уште се обидувам и тоа е сè што можам да кажам. Давам сè од себе на секој турнир и ако победам, одлично, а ако загубам, не е крај на светот. Го правам ова од мои осум години. Татко ми работеше во рудник 30 години, дедо ми 50 години. Само патувам низ светот играјќи смешна игра, добро ме плаќаат за тоа и уживам во тоа. Не може да се ставите под преголем притисок – рече Вилијамс.