Земјоделците треба максимално да ги искористат деновите без врнежи за завршување на сеидбата и садењето на отворено. Успешното презимување на културите ќе зависи од правилната сеидба и искористувањето на преостанатата топлина и влага во почвата, советуваат агрометеоролозите од УХМР.
Сеидбата на јачменот, ’ржта и пченицата е при крај, со цел културите да развијат силен коренов систем пред појавата на првите силни мразови. Во градинарството се расадува есенска зелена салата, а директно се сеат спанаќ и рукола. Кон крајот на октомври се сее и морков и магдонос.
Во овоштарството, поволните температури и влажноста на почвата се погодни за засадување нови насади со јаболка, круши, сливи и бобинки.
Агрометеоролозите препорачуваат и превентивна есенска заштита и дезинфекција бидејќи високата релативна влажност на воздухот создава услови за развој и презимување на фитопатогени организми.
