Второ место за учениците од ООУ „Дане Крапчев“ на натпреварот „First Lego League“ во роботска игра

Учениците од основното училиште „Дане Крапчев“ во населбата Ченто го освоија второто место во светот, на престижниот натпревар „First Lego League“ во роботска игра.

– Во конкуренција на 55 држави и над 1.000 ученици од целиот свет, нашиот тим, со 525 освоени бода, се искачи на светскиот врв и покажа дека Македонија има млади умови што може рамноправно да се натпреваруваат со најдобрите. Ова не е само успех. Ова е доказ дека трудот, знаењето, упорноста и љубовта кон науката создаваат шампиони – соопштија од Општина Гази Баба.

Оттаму додаваат дека овие млади гении седум месеци живееле за својот сон, поминувале низ предизвици, учеле, создавале, верувале и не се откажале во ниту еден момент.

Од Општината упатија честитки и огромна благодарност до наставничката по информатика, Марина Пејковска, која, како што велат, со огромна посветеност, знаење и љубов седум месеци го водела тимот кон овој историски успех.

– Честитки и до неуморните ментори, кои со својата енергија, организацијата и визијата ја претвораа секоја идеја во реалност. Но, и за родителите, кои беа најсилната поддршка, мотиватори и ветар в грб на овие деца, на патот кон светскиот успех. Нека овој успех биде мотивација за сите млади луѓе да веруваат во себе, да сонуваат големи соништа и храбро да чекорат кон нивното остварување – нагласија од Општина Гази Баба.