Жељко Обрадовиќ има 10 милиони на маса за историски „кам-бек“

Европската кошарка е повторно во исчекување на голем трансфер, но овој пат не станува збор за играч, туку за тренерска легенда. Според грчките медиуми, Панатинаикос подготвува спектакуларно враќање на Жељко Обрадовиќ на клупата на клубот.

Наводно, раководството на атинскиот гигант сериозно размислува за промена на тренерската позиција по завршувањето на домашното првенство, а прва желба е токму најтрофејниот европски стратег.

Сопственикот на клубот, Димитрис Јанакопулос, е подготвен да понуди двегодишен договор вреден околу 10 милиони евра, со што Обрадовиќ повторно би станал еден од најплатените тренери во Европа.

Освен финансискиот аспект, Србинот би добил и целосна контрола врз спортскиот проект, што јасно покажува колку Панатинаикос е решен да започне нова ера и повторно да нападне европски трофеи.

Сепак, во Грција не се сите убедени дека овој договор е реален. Односот меѓу Обрадовиќ и Јанакопулос со години е тема на бројни шпекулации, а многумина се прашуваат дали две толку силни личности можат успешно да функционираат во ист систем.

Обрадовиќ испиша златни страници во историјата на Панатинаикос, освојувајќи бројни титули и создавајќи една од најмоќните династии во европската кошарка. Токму затоа неговото евентуално враќање би предизвикало вистинска еуфорија меѓу навивачите.

По заминувањето од Партизан, каде во 2021 година беше пречекан како спасител на клубот, легендарниот тренер е без ангажман и повторно е една од најпосакуваните фигури на европскиот пазар.

Дали Атина навистина ќе го врати својот најголем тренер или станува збор само за уште една голема летна шпекулација, останува да се види во наредните недели.