Зградите тонат во еден од најголемите европски градови поради екстремните горештини

Ова лето Европа беше погодена од исклучително високи температури, а последиците од топлотните бранови не се одразија само врз здравјето на луѓето. Во Лондон, екстремните жештини почнаа да влијаат и врз инфраструктурата. Одделни згради пукаат, додека некои поради поместување на почвата почнуваат да пропаѓаат.

Посебно е загрозен југоистокот на Англија, каде што необично топлото и суво време го забрзува процесот на слегнување на почвата, објави Си-ен-ен.

Глината се собира кога ќе исчезне влагата

Лондон, како и многу други области во Велика Британија, е изграден врз глинено тло. Ваквиот вид почва се однесува како сунѓер – кога има доволно вода, ја апсорбира влагата и се шири, додека за време на долги сушни периоди се суши  и се собира.

Проблемот настанува кога почвата под темелите на објектот не се собира рамномерно. Во тој случај, темелите можат да ја изгубат стабилноста, што доведува до слегнување на објектите и појава на пукнатини.

Лондон е посебно чувствителен бидејќи неговата глинена почва содржи минерали кои силно реагираат на промените во нивото на влага. Истовремено, британската престолнина последниве години бележи сè повеќе екстремно високи температури.

Дополнителен фактор претставува вегетацијата. Како што почвата се суши, корењата на дрвјата и другите растенија продираат подлабоко во земјата во потрага по вода. Бидејќи земјиштето под куќите често е повлажно отколку на отворен простор, корењата можат дополнително да извлекуваат влага и да го забрзаат неговото сушење.

Најзагрозени се старите згради

Екстремните временски услови претставуваат посебен ризик за постарите објекти, кои често имаат поплитки темели.

Повеќе од половината од станбените објекти во Лондон се изградени пред 1945 година, поради што многу згради се поосетливи на промените во почвата.

Според британското осигурително друштво Авива, недвижностите во бројни делови на Лондон би можеле да бидат изложени на ризик од слегнување на почвата до 2030 година.

Британскиот геолошки завод предупредува дека, доколку температурите продолжат да растат со сегашната брзина, повеќе од 26 проценти од лондонските недвижности би можеле да бидат погодени од овој проблем до 2070 година.

Проблемот веќе не е само Лондон

Стручњаците предупредуваат дека слегнувањето на почвата предизвикано од екстремни временски услови не е проблем ограничен само на Лондон. Боб Гибсон, директор на компанијата „Building & Structural Consultants“, изјави дека пред четири децении овој феномен главно бил карактеристичен за Лондон и југоистокот на Англија.

„Но, многу други делови од Обединетото Кралство сега се загрозени поради климатските промени“, предупреди Гибсон.

Растот на температурите веќе се одразува и врз трошоците за осигурување. Вредноста на барањата за отштета поврзани со слегнување на почвата во последните години значително порасна.

Осигурителните компании во текот на 2025 година им исплатиле на жителите околу 415 милиони долари, односно приближно 357 милиони евра, што е за десет проценти повеќе од претходната година.

Гибсон очекува овогодишниот износ да биде уште поголем.

Ќе покрива ли осигурувањето штета?

Брунел Балзано од Универзитетот во Кардиф предупреди дека осигурителните компании во иднина би можеле сè потешко да прифаќаат ризик поврзан со слегнувањето на почвата.

„Мислам дека е можно во блиска иднина осигурувањето повеќе да не покрива слегнување на почвата“, рече Балзано.

Гибсон истакнува дека жителите од загрозените подрачја веќе имаат проблеми при склучување или обновување на полисите за осигурување. Некои компании значително ги зголемуваат премиите, додека други повеќе не се подготвени да покријат штета настаната како последица на слегнување на почвата.

Стручњаците поради тоа предупредуваат дека климатските промени би можеле да донесат дополнителни трошоци за сопствениците на недвижности, но и да отворат сериозни прашања за тоа кој во иднина ќе го сноси финансискиот товар од штетите што ги предизвикуваат сè почестите топлотни бранови и суши.