Зеленски побара енергетско примирје за Велигден, од Кремљ му одговорија: Потребен е мир, не примирје

Кремљ ладно реагираше на предлогот на Украина за воспоставување „енергетско примирје“ за време на велигденските празници, велејќи дека не видел детален предлог за прекин на огнот и дека наместо тоа се залага за сеопфатен мировен договор.

Володимир Зеленски претходно изјави дека сојузниците на Украина „сигнирале“ до Киев за можноста за намалување на нападите со долг дострел врз рускиот нафтен сектор поради порастот на глобалните цени на енергијата, а украинскиот претседател потоа во понеделник изјави дека Украина е подготвена да го стори тоа ако Русија престане да го напаѓа украинскиот енергетски систем.

Зеленски рече дека Киев е отворен за велигденско примирје. Портпаролот на Кремљ, Дмитриј Песков, јасно стави до знаење дека Москва е скептична кон понудата на украинскиот претседател, иако Киев во последните денови постојано го напаѓаше руското балтичко пристаниште Уст-Луга.

„Во изјавите на Зеленски што ги прочитавме, не видовме никаква јасно формулирана иницијатива во врска со велигденското примирје“, им рече Песков на новинарите.

„Зеленски мора да преземе одговорност и да донесе соодветна одлука за да можеме да постигнеме мир, а не само прекин на огнот“, додаде Песков, предупредувајќи дека колку повеќе Зеленски одложува, толку е поголема цената на мирот за Киев.