Зеленски го посетил Роман Абрамович и има предлог за крај на војната: „Замрзнување на фронтовските линии на нивните сегашни позиции“

Украинскиот претседател Володимир Зеленски во интервју за „Скај њуз“ изјави дека „замрзнувањето на фронтовските линии на нивните сегашни позиции“ би бил најбрзиот начин да се стави крај на војната, но нагласи дека ова не треба да биде трајно решение кое би овозможило нова ескалација.

Според него, таквото сценарио би можело да послужи како привремен чекор кон дипломатски процес.

„Да, тоа е најбрзиот начин“, рече Зеленски кога беше прашан дали би прифатил замрзнување на фронтовските линии во моменталната состојба.

Во исто време, тој додаде дека Украина сака решение што би спречило враќање на војната.

„Идејата не е само да се замрзне, туку што побрзо да се премине на дипломатска рамка“, рече тој.

На прашањето дали тоа би значело давање на Русија она што моментално го контролира, Зеленски го отфрли таквото толкување и рече дека останувањето на моменталните линии би значело заштита на украинските граѓани и дозволување на војниците да се вратат дома.

Разговори со Роман Абрамович
Зеленски, исто така, зборуваше за улогата на рускиот бизнисмен Роман Абрамович, кој беше под санкции за време на војната поради блиски врски со Кремљ.

Тој рече дека Абрамович го посетил Киев и пренел порака дека сака да служи како посредник меѓу Украина и Владимир Путин.

„Тој дојде во Киев и рече дека носи директна порака и дека сака да ги пренесе нашите пораки до Путин“, рече Зеленски, додавајќи дека комуникацијата треба да остане приватна.

Зеленски изјави дека ова не е проблем за него и дека јасно го искажал ставот на Украина.

Тој нагласи дека Украина нема да се согласи да го предаде Донбас на Русија:

„Нема да си заминеме. Нема да ви ја дадеме победата на таков начин.“

На прашањето дали Абрамович е посредник меѓу него и рускиот претседател, Зеленски рече дека ги пренел пораките до Путин.

Писмо до Путин и преговори
Зеленски, исто така, зборуваше за своето отворено писмо до рускиот претседател Владимир Путин, во кое предложи директна средба за завршување на војната.

Тој рече дека писмото е објавено јавно бидејќи не е сигурен дали другата страна воопшто ќе одговори и дека Русија ја отежнува комуникацијата со ограничување на пристапот до информации.

Како одговор на коментарите дека Путин наводно ја отфрлил идејата за средба, Зеленски рече дека е подготвен да разговара ако тоа доведе до крај на конфликтот.