Притисок врз Брисел или реален план? Во Полска јавно се зборува за напуштање на ЕУ

Јарослав Качински, лидерот на полската опозициска партија „Право и правда“ (PiS), ја спомена можноста за започнување преговори за повлекување на земјата од Европската унија, доколку другите обиди за реформи се покажат како неуспешни. Полскиот премиер Доналд Туск изјави дека таа битка нема намера да ја изгуби.

Качински ги даде овие изјави во средата, за време на своето обраќање на „Форумот Криница 2026“, каде што зборуваше за потребата од суштински промени во рамките на Европската унија.

„Европската унија мора да се промени. Ова е моето цврсто убедување – убедувањето на мојата политичка опција – а верувам и убедувањето на голем број Полјаци“, рече Качински.

Како можни начини за постигнување промени, тој предложи влијание врз јавното мислење и изготвување нов договор меѓу државите што размислуваат слично, при што стапувањето во сила би било одложено. Тој, исто така, се залага за укинување на Европската комисија, предлагајќи нејзините функции да ги преземе Европскиот совет.

Лидерот на „Право и правда“ истакна дека и Договорот за Европската унија и Договорот за функционирањето на ЕУ ги дефинираат процедурите според кои една земја-членка може да го напушти блокот.

„Сè започнува со преговори, а тие преговори едноставно мора да се иницираат. Тоа е радикален пристап – ризичен пристап – но ситуацијата е навистина толку сериозна што оправдува ваква мерка, доколку другите методи не дадат резултати“, рече тој, додавајќи дека за ова ќе бидат потребни одлучност и усогласување на ставовите меѓу државите на чија поддршка смета.

Премиерот Туск одговори со објава на платформата „Икс“ (X).

„Јарослав Качински тукушто најави дека Полска треба да започне преговори за условите за нејзино повлекување од Европската унија. Токму тоа е, меѓу другото, она што е влог во борбата што моментално се води во Полска – тешка борба. Немам намера да ја изгубам, дури и ако не играат сите на моја страна“, напиша Туск.

Министерот за надворешни работи Радослав Сикорски на социјалните мрежи напиша дека тие „сепак сакаат ’Полекзит‘“, притоа напоменувајќи дека последиците од таквото излегување би вклучувале царински граници со Германија, Чешка, Словачка и Литванија, пасошки контроли на аеродромите, како и укинување на субвенциите за земјоделците.

Додека беше на власт, партијата „Право и правда“ (PiS) ги отфрлаше тврдењата за можно излегување на Полска од ЕУ. Парламентарните избори во Полска се очекува да се одржат во 2027 година.