Вработен во клиника се обидел да го продаде медицинскиот картон на Кејт Мидлтон

Здравствен работник од лондонска клиника се обидел да ги продаде приватните медицински картони на принцезата од Велс, Кејт Мидлтон, пишува британскиот портал Скај њуз.

Вработен во оваа клиника, кој повеќе не работи таму, е предупреден од Канцеларијата на комесарот за информации (ICO) за „намерна злоупотреба“ на приватните медицински картони на принцезата од Велс за финансиска добивка.

Британската принцеза беше примена во болница за абдоминална хирургија во јануари 2024 година.

– По целосна проценка во согласност со Кодексот на однесување за крунските обвинители и Политиката за гонење на ICO, ICO издаде формално предупредување до сега поранешниот здравствен работник со седиште во Лондон во врска со прекршок согласно член 170(5) од Законот за заштита на податоците од 2018 година – се вели во соопштението на ICO, британскиот надзорен орган за приватност и заштита на податоците.

„Однесувањето вклучуваше намерна злоупотреба на високо чувствителни лични податоци и понуда за нивно откривање за финансиска добивка, што е јасно кршење на довербата“, се додава.

Иан Халм, извршен директор на ICO за регулаторен надзор, рече дека „луѓето треба да можат да веруваат дека личните податоци што ги доставуваат до здравствените организации се безбедни и заштитени од експлоатација“.

Надзорниот орган не разјасни што точно подразбира предупредувањето до поранешниот вработен.