На Одделението за очни болести при Општата болница во Велес, операциите на катаракта започнаа на 28 јули оваа година. Досега се успешно оперирани 30 пациенти со примена на PHACO методата и вградување на интраокуларни леќи.
Како што информира д-р Ана Марија Џунџева, портпарол на Јавната здравствена установа Општа болница Велес, за пациентите кои имаат потреба од ваква интервенција, процесот започнува со закажување преглед преку матичен лекар кај офталмолог преку системот „Мој термин“.
Операциите ги изведуваат прим. д-р Бисера Велковска од Универзитетската клиника за очни болести, заедно со тимот на Очнoто одделение во болницата.
Катарактата најчесто се препознава преку постепено заматување на видот и потешкотии во секојдневните активности. Доколку ги забележите овие промени, најдобро е да се направи офталмолошки преглед, порачува докторката.
