Виена наградена: Иновативен проект за помош на жени жртви на дигитално насилство

Градот Виена го освои првото место на меѓународниот eGovernment Award 2026 во Берлин во категоријата „Одржливи промени преку модернизација на државата и трансформација на јавната администрација“. Наградата му беше доделена за проектот „Центар за поддршка на жени жртви на сајбер насилство“, кој ги поврзува заштитата на жртвите и ИТ безбедноста.

Централниот проект на жените кои се изложени на дигитално насилство им обезбедува брза, бесплатна и едноставна помош. Проектот ги обединува психосоцијалното советување и специјализираната техничка поддршка, со што на жртвите им се овозможува на едно место да добијат помош во ситуации како сајбер-демнење (cyberstalking), дигитален надзор, користење шпионски програми, уцени или злоупотреба на лични податоци.

„Сајбер насилството често се случува во тајност и на жртвите им е тешко да докажат што им се случува. Град Виена сака на жените, покрај психосоцијалното советување, да им обезбеди и специјализирана техничка поддршка“, изјави градската советничка за жени Елке Ханел-Торш.

Заменичката градоначалник на Виена и членка на градската влада за дигитализација, Барбара Новак, истакна дека наградата го потврдува пристапот на Виена во кој дигитализацијата се користи првенствено за доброто на граѓаните.

Центарот е основан во 2020 година како заедницки проект на стручњаците од Град Виена, вклучувајќи ја градската канцеларија за прашања на жените MA 57, Urban Innovation Vienna, која се занимава со иновации и развој на градски решенија, и Magistratska direkcija на Град Виена. Целта беше да се пополни важна празнина во системот за заштита од насилство, бидејќи дигиталното насилство често бара и техничко знаење кое класичните советувалишта го немаат.

Во рамките на проектот, експертите од Wien-CERT (градскиот тим за ИТ безбедност) соработуваат со стручњаците од 24-часовната телефонска линија за помош на жени и Здружението на виенските сигурни куќи за жени. Кога постои сомнеж дека преку мобилен телефон, компјутер или друг дигитален уред се врши надзор, техничките експерти се вклучуваат преку постојните советувалишта.

Проектот вклучува и едукација и превенција. Се организираат редовни обуки, изработен е практичен водич за советниците, а партнерските организации континуирано разменуваат искуства.

Град Виена го смета овој проект за пример за добра практика за поврзување на јавната администрација, ИТ безбедноста и заштитата од насилство, а меѓународната награда дополнително го потврдува неговото значење.

EGovernment Award го организираат консултантската компанија BearingPoint и технолошката компанија Cisco, а наградата им се доделува на иновативни проекти за дигитализација во јавниот сектор.