Верстапен во шок по второто место: Сè уште не разбирам како завршивме на подиумот

Ландо Норис ја забележа својата прва победа во сезоната, триумфирајќи на Големата награда на Унгарија по возбудлива трка на патеката Хунгароринг. Возачот на Мекларен ја искористи одличната стратегија на тимот и проблемите на својот тимски колега, Оскар Пјастри, кој долго време беше лидер, но на крајот, мораше да се повлече поради технички дефект.

Второто место му припадна на Макс Верстапен, кој и покрај сериозните проблеми со болидот, успеа да стигне до уште еден подиум. Трет заврши Кими Антонели со Мерцедес, кој дополнително го зацврсти водството во генералниот пласман кај возачите.

По трката, четирикратниот светски шампион не го криеше изненадувањето од освоеното второ место, признавајќи дека не очекувал ваков резултат.

• Искрено, сè уште не разбирам како завршивме втори. Го гледам ова како резултат што ги надмина нашите реални очекувања, што е добро со оглед на тоа како се чувствував, изјави Верстапен.

Холанѓанецот објасни дека во текот на целата трка се мачел со нестабилен болид и прекумерно свртување, истите проблеми што ги имал и во квалификациите.

• Болидот беше наполно ист. Не можевме ништо да промениме по квалификациите, па знаев дека ќе биде многу тешко. И навистина беше, додаде возачот на Ред Бул.

Верстапен истакна дека клучен момент било престигнувањето на Луис Хамилтон, кое му овозможило помирен финиш и пат до второто место. Иако првично се сомневал во стратегијата со меките гуми, таа на крајот се покажала како вистински потег.

Со победата, Норис испрати силна порака дека е повторно конкурентен за највисоките позиции, додека Верстапен уште еднаш покажа дека знае да извлече максимум од својот болид и во тешки околности.