Додека во Скопје се слави новата шампионска титула, во Охрид веќе владее еуфорија пред најважниот натпревар во клупската историја.
Ракометниот клуб Вардар 1961 ја заврши сезоната во домашната Суперлига со победа над Бутел Скопје од 36:34 и официјално го подигна шампионскиот пехар. За „црвено-црните“, ова е 16. титула во клупската историја и прва по пауза од четири години.
Пред почетокот на натпреварот, ракометарите на Бутел им приредија почесна гарда на новите шампиони, а Вардар се прости и со дел од странските играчи, кои по крајот на сезоната ќе го напуштат.
Гостите од Бутел одиграа одлично во првото полувреме и заминаа на пауза со предност од 19:17. Сепак, во вториот дел Вардар ја потврди улогата на фаворит и со доминантна игра стигна до убедлива победа. Скопскиот состав ја заврши сезоната со 30 победи и само два порази, доволно за титулата, со осум бода предност пред второпласираниот тим.
Во исто време, и ГРК Охрид ја затвори сезоната во домашното првенство со победа, но целото внимание сега е насочено кон Европа. Охриѓани ги очекува реванш од финалето во ЕХФ Европскиот куп, против тимот на Татабања.
Натпреварот ќе се игра в недела од 20:00 часот, а „гладијаторите“ ќе имаат историска можност да го освојат првиот европски трофеј пред своја публика. Во реваншот влегуваат со минимална предност од еден гол, од првиот меч во Унгарија.
Охрид е на чекор до најголемиот успех во клупската историја, а градот веќе живее за европската ракометна вечер.
