Волонтерскиот центар Скопје заедно со „За почиста Македонија“, в сабота, во 11:00 часот, организира акција за чистење на Водно.
Планирано е да се исчисти патеката кон жичницата.
– Кога ќе стигнете на Средно Водно, побарајте ги ознаките на „За почиста Македонија“ – таму ќе нè најдете. Вреќи, ракавици и друг алат за чистење – како и добро друштво – се обезбедени. Колку повеќе нè има, толку подобро – ѓубрето нема да има никакви шанси – велат организаторите на акцијата.
Тие ги повикуваат граѓаните да се придружат во оваа акција и да покажат, како што велат, дека меѓу нас има многу љубители на природата.
– Овој настан е повеќе од обично чистење – тоа е можност да запознаете луѓе со слични интереси. Останете и откако ќе завршиме со работата, за да поразговараме, да одиграме некоја игра и, едноставно, да се дружиме – покануваат организаторите.












