Ужас во Тексас: Средношколец пукал во наставничка па си го одзел животот, мотивот се утврдува/ВИДЕО

Средношколец во Тексас пукал во наставничка, а потоа го вперил пиштолот кон себе и си го одзел животот. Пукањето се случило во подготвителното средно училиште „Хил Кантри Колеџ“ во Булверде, град на околу 25 милји северно од Сан Антонио, објави „Скај њуз“.

Полиција: Ученик починал на местото на настанот
Канцеларијата на шерифот на округот Комал објави на социјалните мрежи дека наставничката била однесена во болница по нападот. „Ученикот ја застрелал наставничката, која била однесена во болница во Сан Антонио. Во моментов немаме нови информации за нејзината состојба“, се вели во соопштението. „15-годишниот ученикот вклучен во инцидентот починал на местото на настанот“. Портпарол на канцеларијата на шерифот потврди за новинската агенција АП дека ученикот починал од самонанесена прострелна рана.

Училиштето е во блокада, учениците се безбедни
Училиштето е во блокада по пукањето, кое се случило во 8:34 часот по локално време. „Учениците и персоналот ги следат утврдените процедури. Локалните органи за спроведување на законот се на местото на настанот“, објави училиштето на својата X платформа. Учениците беа однесени со автобуси во блиското средно училиште за да се сретнат со своите родители. Во подоцнежно соопштение, училиштето соопшти дека кампусот е безбеден и дека „заканата е елиминирана“.

Мотивот сè уште е непознат
Властите не објавија никакви информации за тоа што довело до трагичниот инцидент. Училиштето, кое е дел од училишниот округ Комал, се опишува себеси како училиште со „силен фокус на академските достигнувања и подготвеноста за колеџ“ и им служи на ученици на возраст од 14 до 18 години.

Канцеларијата на шерифот подоцна им се обрати на родителите на Фејсбук. „Разбираме колку ова беше застрашувачко за семејствата и за целата наша заедница. Ви благодариме за вашето трпение“, се вели во соопштението.