Турците туркаат преговори: Ердоган сака да ги помири Путин и Зеленски

Анкара се обидува да го оживее дијалогот меѓу Русија и Украина и бара поголема одговорност за безбедноста на Европа од своите сојузници во НАТО

Турција вложува напори да ги оживее преговорите меѓу Русија и Украина и да ги собере лидерите на завојуваните страни, му рече турскиот претседател Реџеп Таип Ердоган на генералниот секретар на НАТО, Марк Руте, на состанокот во Анкара, објави канцеларијата на турскиот претседател во среда.

Претходно, вчера, Киев објави дека побарал од членката на НАТО, Турција, да биде домаќин на состанок на лидери со Русија.

Анкара одржува добри односи и со Украина и со Русија од почетокот на руската инвазија во 2022 година.

„Ние, како Турција, сме ангажирани за мирно завршување на војната меѓу Украина и Русија и за работа на оживување на преговорите и започнување разговори на ниво на лидери“, се вели во соопштението за медиумите од канцеларијата на Ердоган за состанокот.

Турскиот претседател му рекол на Руте дека одржувањето на трансатлантските врски е „неопходно“, но дека Анкара очекува европските сојузници во НАТО да преземат поголема одговорност за трансатлантската безбедност.

Ердоган подоцна телефонски разговорал со германскиот канцелар Фридрих Мерц, според соопштението за медиумите, кому му рекол дека војната меѓу САД и Иран „почнува да ја ослабува Европа“ и дека штетата од конфликтот ќе се зголеми ако светските сили не интервенираат со „мирноориентирани пристапи“.

„Ердоган изјави дека Турција работи на тоа да ја заврши украинско-руската војна преку преговори и да постигне траен мир, исто како што се обидува да го стори тоа со Иран“, се вели во посебна изјава од кабинетот на претседателот.

Турција граничи со Иран и постојано повикува на прекин на војната. Минатиот викенд таа беше домаќин на дипломатски форум на кој присуствуваа делегации од сите страни и е во близок контакт со САД, Иран и медијаторот Пакистан.

Голем пресврт во руско-украинската војна: Се подготвува средба Путин-Зеленски, Украинците бараат локација