Три години по масакрот кај Младеновац, Србија сè сеќава на жртвите

Во Дубона, кај Младеновац, и Мали Орашје, кај Смедерево, денес се одбележува третата годишнина од масовното убиство, кога Урош Блажиќ уби девет и тешко повреди 12 млади луѓе, за што е осуден правосилно на 20 години затвор. Во училишниот двор во Дубона, венци и цвеќе положуваат членови на семејствата на жртвите, роднини, пријатели и мештани.

Во ова село на 4 мај 2023 година, Урош Блажиќ ги уби братот и сестрата – Милан (22) и Кристина Паниќ (19), како и Далибор Тодоровиќ (24).

Во Мали Орашје, венци и цвеќе ќе бидат положени кај Равни Гај, каде што беа убиени Никола Милиќ (14), Александар Миловановиќ (17), Марко Митровиќ (18), Лазар Миловановиќ (19), Немања Стевановиќ (21) и Петар Митровиќ (25), кој почина 50 дена по злосторството.

По церемонијата на положување венци во Мали Орашје, ќе започне програма за сеќавање на жртвите, по што ќе следи традиционален меморијален турнир наречен „Живеете“.

Турнирот е заеднички организиран од родителите на жртвите, ФК Равни Гај и Фондацијата „Анѓелина“.

На 19 септември 2024 година, српската влада одлучи да ги воспостави 3 и 4 мај како Денови на сеќавање на жртвите на масовните убиства што се случија во основното училиште „Владислав Рибникар“ во Белград и во Орашје и Дубона, а планирано е овие денови да се одбележуваат секоја година.

Основните и средните училишта во Србија ја одбележуваат Неделата на сеќавање и единство од денес до 8 мај.

На 4 мај 2023 година, Урош Блажиќ уби девет и тешко рани 12 млади луѓе со автоматска пушка, и беше осуден на 20 години затвор. Со оглед на тоа што во времето на извршување на кривичното дело имал помалку од 21 година, според Кривичниот законик, како млад возрасен човек, не можел да биде осуден на максимална казна доживотен затвор.

Со истата пресуда, неговиот татко Радиша Блажиќ е исто така осуден на 20 години затвор за кривичните дела нелегално производство, поседување, носење и пуштање во промет оружје и експлозиви и тешко кривично дело против јавната безбедност.