Трамп: Со операцијата „Пајажина“, Украинците му дадоа причина на Путин да ги срамни со земја

Американскиот претседател Доналд Трамп делумно го оправда синоќешниот масовен руски напад врз украинските градови започнат претходната ноќ, како одговор на украинската операција „Пајажина“.

„Му дадоа на Путин причина да ги бомбардира до смрт синоќа“, им рече Трамп на новинарите на авионот „Ер Форс Уан“.

„Тоа е она што не ми се допаѓа во врска со тоа. Кога го видов, реков: „Еве го, сега ќе следи напад“, додаде Трамп.

Русија започна масовен напад со ракети и беспилотни летала врз Украина во текот на ноќта на 6 јуни, насочен кон главниот град, поголемите градови и најзападните делови од земјата.

Според украинскиот претседател Володимир Зеленски, вкупно 80 лица беа повредени, а четири лица беа убиени, вклучувајќи и персонал од службите за итни случаи.

Украина, инаку, на 1 јуни изврши напад со беспилотни летала врз четири клучни руски воени воздухопловни бази, уништувајќи или оштетувајќи 42 авиони, вклучувајќи тешки бомбардери и ретки извидувачки авиони А-50. Киев тврди дека онеспособила 34% од руската флота на стратешки бомбардери, што се смета за една од најсмелите операции во целата војна.

На 5 јуни, Трамп предупреди дека рускиот одговор на украинската операција „Пајажина“ веројатно нема да биде убав.

„Не ми се допаѓа, реков дека не го прават тоа, не треба да го прават, треба да престанат“, додаде Трамп.

И покрај постојаните повици на Трамп за прекин на непријателствата меѓу Русија и Украина, тој продолжи да го одложува понатамошниот притисок врз Москва преку санкции. На прашањето кога ќе воведе нови санкции врз Русија, Трамп одговори: „Да, имам рок на ум“, без да прецизира датум.