Летовите во САД повторно се воспоставени по повеќечасовен прекин – сепак, се очекуваат доцнења и откажувања

Американската Федерална управа за авијација (FAA) соопшти дека авиокомпаниите можат да продолжат со летовите, откако претходно, поради дефект во системот за контрола на летање, беше воведена целосна забрана за полетувања низ целата земја, која траеше неколку часа. Сепак, се очекува доцнењата и откажувањата на летовите да продолжат и во натамошниот период.

Забраната за полетувања, која погоди милиони Американци, беше укината во 20:15 часот по локално време, изјави американскиот секретар за транспорт, Шон Дафи.

Сепак, Дафи им изјави на новинарите дека прекинот оставил последици и дека проблемите што произлегле од тоа веројатно ќе траат уште неколку дена.

Од FAA наведоа дека „темелно ги тестирале“ своите системи за да се осигурат дека се стабилни и дека работењето е безбедно, пред да дадат дозвола за продолжување на летовите.

Американската Федерална управа за авијација (FAA) издаде наредба за запирање на сите полетувања низ Соединетите Држави, поради, како што беше наведено, „вонредни околности и безбедносни причини“, откако беа пријавени сериозни проблеми во комуникацијата во рамките на контролата на летање.

Оваа мерка значеше дека авионите што веќе биле во воздух добиле дозвола да слетаат, додека на оние што се наоѓале на земјата им било забрането да полетаат, сè до дополнително известување.

Кратко пред донесувањето на оваа одлука, FAA го прекина воздушниот сообраќај во Чикаго поради проблеми во комуникацијата со контролата на летање. Меѓународните летови ќе се разгледуваат поединечно, во зависност од околностите, соопштија од FAA, пренесува „Ројтерс“.

Втор ваков случај по нападите од 11 септември 2001 година

Ова е само вторпат, по терористичките напади од 11 септември 2001 година, да се воведе целосен прекин на сите полетувања во Соединетите Држави. Претходниот случај се случи во јануари 2023 година, кога FAA ги запре сите домашни полетувања во траење од помалку од два часа, поради проблем со системот што се користи за известување на пилотите.

Минатата година, Конгресот на САД одобри 12,5 милијарди долари за надградба на застарениот комуникациски систем на FAA, додека во петокот, Агенцијата и Белата куќа побараа дополнителни 30,1 милијарди долари за решавање на други проблеми во системот за воздушен сообраќај.