Трамп под притисок: Каде завршија милијардите од венецуелската нафта?

Администрацијата на американскиот претседател Доналд Трамп остварила повеќе од 13 милијарди долари приходи од продажбата на венецуелска нафта оваа година, но сè уште е нејасно каде завршиле парите, објавува „Фајненшл тајмс“.

Соединетите Американски Држави ја презедоа контролата врз извозот на венецуелска нафта на почетокот на годината и делумно ги ублажија санкциите, велејќи дека средствата ќе бидат искористени за помош на земјата и нејзините граѓани. Сепак, очекуваното закрепнување на венецуелската економија не се оствари, што предизвикува сомневања дека не сите пари се вратени во Каракас.

Како резултат на тоа, сè поголем број членови на американскиот Конгрес, и демократи и републиканци, бараат од администрацијата да објасни како управува со милијарди долари приходи и какви мерки се преземаат за спречување на корупцијата.

Според проценките на „Фајненшл тајмс“, врз основа на податоците за извозот и пазарните цени на нафтата, вкупните приходи надминале 13 милијарди долари. Сепак, официјалните податоци за користењето на средствата речиси и да не постојат, а само еден трансфер од 300 милиони долари е евидентиран на веб-страницата наменета за следење на парите.

Притисокот врз администрацијата дополнително се зголеми по катастрофалниот земјотрес што ја погоди Венецуела кон крајот на јуни. Обединетите нации ја проценуваат штетата на околу 37 милијарди долари, што доведе до повици дел од приходите од нафта да се искористат за обнова на земјата.

Иако официјалните лица велат дека средствата се користат во корист на американскиот и венецуелскиот народ, Трамп претходно изјави дека САД „заработуваат многу пари“ од венецуелската нафта. Венецуелските економисти предупредуваат дека без целосна транспарентност, невозможно е да се утврди каде завршил поголемиот дел од тие пари.