Американскиот претседател Доналд Трамп и првата дама Меланија Трамп вчера попладне ги пречекаа британскиот крал Чарлс III и кралицата Камила во Белата куќа, а на претседателот не му требаше долго време да го прекрши кралскиот протокол, објавува „Дејли меил“. По фотографирањето, делегацијата се упати кон главната резиденција на Белата куќа, каде што требаше да се напијат чај во Зелената соба и да го разгледаат пчеларникот на Јужниот тревник.
Според „Дејли меил“, кога влегле, Трамп го потапкал кралот по рамото како знак на наклонетост, со што го прекршил кралскиот протокол.
Главното и непишано правило е никогаш да не се воспоставува физички контакт со член на кралското семејство.
Експертите за говор на телото проценија дека гестот бил воздржан и дека кралот Чарлс не покажал никаква непријатност.
„Овој допир додека влегуваа, исто така, изгледаше како политички гест. Тоа беше и првиот вистински гест на активно, „посебно“ пријателство овде од прилично порезервираниот Трамп“, изјави за „Дејли меил“ Џуди Џејмс, експерт за говор на телото.
Трамп претходно го прекрши кралскиот протокол, свртувајќи ѝ го грбот на кралицата Елизабета и одејќи пред неа додека минуваа покрај војниците во јули 2018 година.
Тој, исто така, го зграпчи кралот Чарлс над лактот за време на нивниот прв поздрав во септември 2025 година.
По чајанката се очекува паровите да направат кратка обиколка на Белата куќа, каде што ќе го видат дрвото засадено од мајката на кралот, кралицата Елизабета, за време на посетата во 1991 година.
Кралското семејство ќе ја посети резиденцијата на британскиот амбасадор во САД, а билатерален состанок на кралското семејство е закажан за вторник во Овалната соба.
Се очекува членовите на кралското семејство да се обратат и пред Конгресот на заедничка седница, со што кралот Чарлс ќе стане вториот британски монарх што го сторил тоа.
