Џефри Сакс: Мојот совет до Европа е да се разбуди и да ги интегрира Македонија и Србија и другите земји-кандидати во ЕУ

Американскиот економист Џефри Сакс ја повика Европската унија (ЕУ) „да се разбуди“, да ја прифати реалноста и да ги интегрира  Македонија, Србија и другите земји-кандидати.

„Знаете, мојот совет до Европа е да се разбуди и да ја прифати реалноста. Ова, се разбира, значи интегрирање на вашата земја, Србија и другите земји-кандидати во Европската унија. Сметам дека и Украина треба да стане членка на Европската унија, но како неутрална држава“, рече Сакс во видео-обраќањето до Школата за млади лидери, основана од поранешниот македонски претседател Ѓорге Иванов.

Тој нагласи дека не сака Европа да се претвори во милитаризиран простор, а уште помалку да биде дефинирана како регион спротивставен на Русија.

„Тоа е огромна грешка – можеби дури и катастрофална. Европа треба да биде регион на интеграција и соработка – регион кој колективно ќе спроведе зелена транзиција, ќе гради инфраструктура и ќе обезбеди мир и трговска соработка со Русија, Кина, Индија и остатокот од светот“, изјави Сакс во своето видео-обраќање.

Истакнатиот американски економист додаде дека тој лично би го укинал НАТО, бидејќи не гледа причина за неговото понатамошно постоење. „Би го укинал уште во 1991 година, а би го укинал и денес. Тоа беше организација создадена за да спречи инвазија од страна на Советскиот Сојуз – кој веќе не постои. И верувам дека Русија нема ниту намера, ниту интерес да ја нападне Европа. Русија сака сопствена безбедност. Тоа е сè. И токму на тоа мислиме кога зборуваме за принципот на неделива безбедност“, рече Сакс.

Тој додаде дека сака Македонија да стане членка на Европската унија и дека верува во Европската унија – иако не во начинот на кој таа моментално функционира.

„Верувам во реформирана визија за Европската унија – како светилник на мирот, соработката, зелената економија и високиот квалитет на живот. Тоа е вистинската европска улога. Европа е особено добра во ова. Квалитетот на живот во Европа е многу висок и таков треба и да остане – не преку војни и милитаризација, туку преку промовирање на ’добриот живот‘, во аристотеловска смисла на тој поим“, заклучи Сакс, пренесува „Бета“.