Трамп го менува курсот кон Русија: Енергетската криза ги „скрши“ санкциите

Администрацијата на американскиот претседател Доналд Трамп направи ненадеен и неочекуван пресврт во енергетската политика што може да го потресе единството на западниот блок. Вашингтон итно ги ублажи санкциите врз руската нафта во обид да го ограничи драматичниот пораст на цените на енергијата што се заканува да предизвика сериозни нарушувања на глобалниот пазар.

Според „Њујорк тајмс“, оваа одлука претставува „остар пресврт“ од претходната стратегија и веќе предизвика нови тензии меѓу САД и нивните европски сојузници. Додека Вашингтон беше принуден да реагира на порастот на цените на енергијата, некои европски престолнини инсистираат на продолжување на силниот економски притисок врз Москва.

„Овој потег на администрацијата на Трамп би можел дополнително да ги подели САД и Европа, која беше скептична кон нападот на Трамп врз Иран и изрази желба да продолжи да врши економски притисок врз Русија“, се вели во aнализата на американскиот весник.

Одлуката е исто така значително отстапување од минатогодишната политика на Белата куќа. Трамп постојано најавуваше строги мерки, вклучително и воведување царини за Индија и други земји што продолжуваат да купуваат руска нафта. Сега, сепак, Вашингтон се најде во позиција привремено да попушти токму на овој фронт.

Министерството за финансии на САД издаде посебно овластување кое дозволува купување руска нафта и нафтени производи натоварени на танкери до 12 март. Ова овластување важи малку помалку од еден месец, имено до 11 април. Набљудувачите го толкуваат овој потег како индиректно признание дека претходната стратегија, која вклучуваше казнување дури и на сојузниците за соработка со Русија, наиде на сериозни ограничувања.

Во меѓувреме, геополитичките тензии меѓу Вашингтон и Брисел дополнително се зголемија поради различните ставови за воената операција на САД против Иран. Скептицизмот на европските земји кон овој потег станува сè поизразен, што дополнително ги комплицира односите во рамките на западната алијанса.

Сепак, економската реалност покажува дека енергетската криза брзо излегува од контрола. Блокадата на Ормутскиот теснец го доведе глобалниот пазар на работ на сериозна нестабилност. Цената на суровата нафта Брент оваа недела надмина 119 долари за барел, што е зголемување од речиси една третина за краток временски период.

Ситуацијата во Европа е уште подраматична. Од крајот на февруари, цените на бензинот се зголемија повеќе од двојно, ставајќи дополнителен притисок врз економиите и домаќинствата низ целиот континент. Соочена со вакви притисоци, администрацијата во Вашингтон беше принудена итно да реагира, вклучително и активирање на ресурси од стратешките резерви за стабилизирање на американските и глобалните енергетски пазари.