Поранешната шведска премиерка Магдалена Андерсон е на пат да се врати на власт по четири години. Излезните анкети покажуваат дека нејзиниот левичарски блок освојува 51,3 отсто од гласовите, додека сојузот предводен од актуелниот премиер Улф Кристерсон – во кој влегуваат и екстремно десничарските „Шведски демократи“ – останува на 46,8 отсто.
Според анкетата спроведена при излегување од избирачките места од страна на шведскиот јавен сервис SVT, блокот предводен од социјалдемократката Магдалена Андерсон има јасна предност.
Сепак, конечниот резултат сè уште не е познат. Во минатото, анкетите спроведени при излегување од избирачките места во Шведска не секогаш прецизно го предвидувале исходот, а појасна слика се очекува откако ќе се пребројат гласовите од поголем број изборни единици. Така во 2022 година, тие предвидуваа убедлива победа за блокот на Магдалена Андерсон, но на крајот изборите ги доби десничарската коалиција предводена од Улф Кристерсон, актуелниот шведски премиер.
Победата на десниот блок би ја внела во владата – за првпат – екстремно десничарската партија „Шведски демократи“, која ужива поддршка од 17,2 отсто според анкетите на SVT. Многумина на овие избори гледаат како на референдум за оваа партија, која има корени во неонацистички кругови. Самите избори ќе одредат дали оваа скандинавска нација од 10,6 милиони луѓе ќе го продолжи свртувањето кон десницата или ќе се врати на либерализмот по кој долго време беше позната.
Опозицијата од левиот центар имаше тесно водство пред актуелниот десен блок во пресрет на парламентарните избори, според неколку анкети спроведени оваа недела.
Сепак, Кристерсон – кој заостануваше во анкетите на јавното мислење за време на неговиот четиригодишен мандат – се обиде да ја намали разликата во последните недели од кампањата, додека поддршката за Андерсон и социјалдемократите опадна.
