Трамп ги испрати своите луѓе во Пакистан: Иран им ги претстави барањата и сомнежите на медијаторите

Иран ги пренел своите барања и резерви до пакистанските медијатори во врска со предлозите на САД, изјавил извор вклучен во разговорите за Ројтерс.

Иранскиот министер за надворешни работи, Абас Арагчи, пристигнал во Исламабад преку ноќ и се сретнал со началникот на пакистанската армија и министрите за внатрешни работи и надворешни работи утрово.

Директни разговори меѓу САД и Иран не се планирани за овој викенд, иако Белата куќа вели дека пратениците Стив Виткоф и Џаред Кушнер ќе патуваат во Исламабад денес.

Американскиот претседател Доналд Трамп вчера изјави дека Иран „дава понуда и ќе видиме“, но дека сè уште не знае каква е понудата.

Трамп инсистира дека секој потенцијален договор мора да вклучува откажување од збогатениот ураниум од страна на Иран и дозволување нафтата слободно да тече низ Ормутскиот теснец.

Делегациите на САД и Иран последен пат се сретнаа во пакистанскиот главен град Исламабад пред две недели. Разговорите траеја 21 час, но завршија без договор за прекин на војната. Американскиот потпретседател Џ.Д. Венс во тоа време изјави дека главниот проблем е одбивањето на Иран да се откаже од својата нуклеарна програма, додека шефот на иранскиот преговарачки тим, Мохамед Багер Галибаф, рече дека САД не успеале да ја добијат довербата на иранската делегација.