Топлинските бранови и војните ги зголемуваат трошоците: Храната во светот е најскапа во последните три ипол години

Цените на храната во светот сега се највисоки во последните три и пол години, бидејќи летните топлотни бранови и војните во Украина и Блискиот Исток ги зголемуваат трошоците, пишува британскиот весник „Гардијан“.

Индексот на цените на храната на Организацијата за храна и земјоделство на ОН (ФАО) се искачи минатиот месец на највисоко ниво од јануари 2023 година поради зголемувањето на цените на житарките, шеќерот и растителното масло.

ФАО ги наведе топлотните бранови како фактор што влијае на приносите на пченица во неколку клучни земји производители, додека цените на шеќерот се зголемија поради стравот од влијанието на топлото и суво време врз приносите на земјоделските култури во Европската Унија и штетите предизвикани од глобалниот временски систем Ел Нињо.

Аналитичарите велат дека овогодинешниот Ел Нињо, атмосферско-океански феномен предизвикан од промени во правецот на ветерот и температурата на водата во тропскиот Тихи Океан, би можел да биде најсилниот во последните 70 години.

Земјоделците низ Европа предвидоа дека екстремната топлина, сушата и шумските пожари ќе го погодат производството на храна и ќе ги зголемат цените.

Здружението на производители на зеленчук „Легумес де Франс“ оваа недела предупреди дека се изгубени илјадници тони производи во вредност од десетици милиони евра, вклучувајќи зелена салата, моркови, праз, лук и кромид.

Ценовниот индекс на ФАО, кој ги следи месечните промени во глобалните цени на храната, покажа дека цените на житарките се зголемиле за 3,4 проценти во јули во однос на јуни, вклучувајќи зголемување од 5,8 проценти на светските цени на пченицата.

Континуираните прекини во извозните текови во Црното Море и штетите врз извозната инфраструктура по интензивираните напади од Русија и Украина ги зголемија цените.

Светските цени на пченката се зголемија за 3,6 проценти, што ФАО го припиша на загриженоста за топлото и суво време во делови од американскиот појас за пченка.

Се проценува дека смртоносниот топлотен бран што ја погоди Европа во јуни, поттикнат од емисиите на јаглерод, уништи девет милиони тони пченица, јачмен, пченка и овес.

Цените на шеќерот се зголемија за 5,6 проценти во јули, што ФАО го припишува на временските услови и новите правила за производство во Бразил.

Цените на растителното масло се зголемија за 2 проценти, што извештајот го припишува на поголемата побарувачка за биодизел во Индонезија и повисоките цени на суровата нафта.
Војната во Иран, исто така, влијаеше врз цените на храната во последните месеци, бидејќи околу една третина од светското ѓубриво поминува низ Ормутскиот теснец.

Цените на месото паднаа за 2,8 проценти во јули, што е првиот месечен пад оваа година, вклучувајќи ги цените на живината, свинското и говедското месо.

Сепак, високите летни температури ја ограничија стапката на раст на производството на свињи, што донекаде го ублажи падот на цените, соопшти ФАО.

Цените на млечните производи паднаа за 0,7 проценти, поттикнати од падот на цените на путерот за 2,4 проценти и падот на цените на млекото во прав за 1,7 проценти. Цените на сирењето се зголемија за 1,7 проценти, пренесе „Бета“.