Италијанскиот фудбал остана во шок по однесувањето на дел од навивачите на Јувентус за време на минутата молчење во чест на Сандро Мацола. Легендарниот италијански фудбалер почина во саботата, по што Италијанската фудбалска федерација одлучи сите натпревари во Серија А да започнат со минута молчење. Но, на „Алијанц“ во Торино се случи сцена која предизвика жестоки реакции.
За време на минутата молчење, дел од навивачите на Јувентус свртеа грб и започнаа да исвиркуваат. Причината беше тоа што Мацола е една од најголемите легенди во историјата на Интер, клуб со кој Јувентус има едно од најголемите ривалства во италијанскиот фудбал. Иако Мацола во текот на кариерата често им задавал болка на навивачите на Јувентус, се очекуваше ривалството барем за момент да биде ставено настрана. Наместо тоа, однесувањето на дел од домашните навивачи предизвика осуда.
Јувентус подоцна реагираше со официјално соопштение, во кое порача дека никакво ривалство не може да го оправда недостатокот на почит за време на минута молчење. Од клубот додадоа дека почитувањето на оние на што им се оддава почест е заедничка одговорност која ги надминува навивачките определби и клупските бои. По натпреварот, внимание привлече и реакцијата на тренерот Лучано Спалети, кој не сакаше директно да го осуди однесувањето на навивачите.
An interesting debate has ensued amongst the football community about Juventus ultras turning their backs on Mazzola.
Rivarly or Trivially? pic.twitter.com/8fdzyLKNgb
— 𝓙𝓾𝓿𝓮𝓷𝓽𝓲𝓼𝓼𝓲𝓶𝓸 (@Juventissimo90s) September 20, 2026
На теренот, пак, Јувентус имаше причина за славје, бидејќи ја совлада Аталанта со 2:0. Головите ги постигнаа Консеисао и Бремер, со што „Старата дама“ стигна до десет освоени бодови по првите пет кола.
Во центарот на вниманието, сепак, остана Сандро Мацола и неговото огромно наследство во италијанскиот фудбал. Тој целата професионална кариера ја помина во Интер, од 1960 до 1977 година, запишувајќи 565 настапи и 158 голови. Со клубот освои четири титули во италијанското првенство, два купа на европските шампиони и два Интерконтинентални купа.
Мацола беше голема ѕвезда и на италијанската репрезентација. За „аѕурите“ одигра 70 натпревари и постигна 22 голови. Беше дел од тимот кој го освои Европското првенство во 1968 година, а две години подоцна стигна и до финалето на Светското првенство во Мексико. Играше како напаѓач и офанзивен играч за врска, а беше и капитен на Интер.
Легендарниот фудбалер беше син на Валентино Мацола, капитенот на славниот тим на Торино, кој загина во авионската несреќа кај Суперга во 1949 година. Токму поради огромниот придонес во италијанскиот фудбал, Сандро Мацола останува една од најпрепознатливите фигури во историјата на Интер и на италијанскиот спорт.
Наместо минутата молчење во негова чест да помине во достоинствена атмосфера, сцените од „Алијанц“ предизвикаа нова бура и покажаа дека ривалството меѓу Јувентус и Интер сè уште носи огромни емоции.
