Суд на правдата на ЕУ: Мета и другите платформи мора да им платат на медиумите за користење вести

Судот на правдата на ЕУ пресуди дека земјите-членки можат да наметнат обврска за „фер надомест“ на издавачите кога дигиталните платформи ја користат нивната содржина за вести. Со ова се потврди италијанската регулаторна рамка во спор против американската компанија Мета, сопственик на Фејсбук и Инстаграм.

Одлуката е донесена во постапка покрената откако Мета ги оспори италијанските правила, тврдејќи дека тие не се во согласност со европското законодавство за единствениот дигитален пазар и авторските права, објавува Sole 24 Ore.

Италијанскиот суд побара толкување од Судот на правдата на Европската Унија за да утврди дали националните прописи можат да ги обврзат платформите да им плаќаат на издавачите.

Судот пресуди дека правото на издавачите да добиваат надомест за користење на нивните публикации онлајн е во согласност со правото на Европската Унија, под услов надоместокот да претставува економски еквивалент на лиценца за користење на содржината.

Издавачите, исто така, имаат право да одлучат дали ќе им дозволат на платформите да ја користат нивната содржина, со или без надомест, или целосно да одбијат да го сторат тоа, се наведува во судската одлука.

Особено е значајно што Судот на правдата на Европската Унија, исто така, ја потврди обврската на платформите да водат преговори со издавачите, да ги обезбедат потребните податоци за пресметување на надоместокот и да не ја ограничуваат видливоста на содржината за време на тој процес.

Овие обврски, иако ја ограничуваат слободата на работење, беа оценети како оправдани со цел да се заштитат инвестициите на медиумските компании и да се воспостави рамнотежа на пазарот.