Во Србија и Словенија се уапсени шест лица, осомничени се за заеднички транспорт на наркотици

Српската полиција уапси три лица осомничени дека се дел од организирана криминална група вклучена во производство и трговија со дрога, додека две други лица се сè уште на слобода. Во Словенија беа уапсени уште три лица, под сомнение дека се дел од истата криминална група. Операцијата беше спроведена во соработка со српското и словенечкото обвинителство, како и со словенечката полиција, пренесува „РТС“.

Во Србија, уапсени се С. Ѓ. (54), С. К. (53) и А. К. (23), под сомнение дека се здружиле заради производство и продажба на дрога.

Дополнително, во Словенија се уапсени српскиот државјанин А. Ј. (34), словенечкиот државјанин С. З. (39) и државјанинот на Босна и Херцеговина, М. Ј. (44), кои исто така се сомничат дека се дел од истата криминална група.

Според наводите, тие основале меѓународни транспортни компании во Хрватска, Унгарија, Словачка и Србија, регистрирајќи камиони на овие правни субјекти, кои потоа биле користени за шверц на дрога.

Во кабините на камионите биле изградени специјални прегради за криење дрога, додека товарните простори се користеле за превоз на легална стока.

Понатаму, во втората половина на 2025 година, во Франција – во соработка со француските царински органи – беа уапсени двајца возачи, српските државјани В. П. (40) и Љ. Ј. (58). Тие се сомничат дека, во име на оваа криминална група, користеле камиони за шверц на дрога од Шпанија. Во две одвоени операции биле запленети 471 килограм хашиш и 15 килограми марихуана.

Во мај 2026 година, словенечката полиција ги уапсила српскиот државјанин Д. С. (53) и словенечкиот државјанин Р. А. (37), за време на примопредавање на 60 килограми кокаин и 46.000 евра.

За прибирање докази во врска со активностите на организираната криминална група, била воспоставена соработка со полициските служби на Унгарија, Франција, Хрватска и Австрија. Информациите се разменуваа преку офицери за врска, како и преку каналите на „Европол“ и „Евроџаст“.