Паркот на Франкофонија од утре до 20 септември ќе биде домаќин на второто издание на Street Food Picnic, тридневен настан кој ќе понуди добра храна, музика и содржини за целото семејство.
-Овогодинешното издание е посветено на семејното дружење и заедничкото поминување време на отворено. Во опуштена пикник атмосфера, посетителите ќе можат да уживаат во разновидна гастрономска понуда, музичка програма и детски работилници со игра и креативни активности – информираат од Општина Центар.
Градоначалникот на Општина Центар, Горан Герасимовски, ги покани граѓаните да бидат дел од тридневното дружење во Паркот на Франкофонија.
– Идејата е едноставна – да излеземе од дома, да се собереме во парк, да каснеме нешто вкусно, да слушаме добра музика, а децата да имаат свои активности и забава – нагласи Герасимовски и ги повика сите, со семејствата и пријателите, да се придружат на забавата.
За гастрономскиот дел ќе се погрижат девет изложувачи, со избор на солени и слатки специјалитети.
Богата програма е предвидена и за љубителите на музиката. В петок ќе настапат Големата вода и Васо, в сабота, Shurbe, Day Off и Flooder, додека в недела, музичката програма ќе ја заокружат Dimish, Trio Zigot и Machki.
Посебен дел од програмата е наменет за најмладите, кои во текот на викендот ќе можат да учествуваат во детски работилници, да се забавуваат и да поминат квалитетно време на отворено.
Street Food Picnic 2 се одржува со поддршка на Општина Центар, а настанот е отворен за сите посетители.
В петок програмата започнува во 17:00 часот и ќе трае до полноќ, додека в сабота и в недела започнува во 12:00 часот и ќе трае до полноќ.
