Северната обиколница во фокусот на разговорите

Во посета на Општина Гази Баба беше висока делегација на инвеститори од Обединетите Арапски Емирати, со која беше остварена значајна средба насочена кон продлабочување на економската соработка и кон отворање нови перспективи за развој на Општината.

Делегацијата ја сочинуваа: Н.Е. д-р Хамад ал Памси, претседател на „Емирејтс инвестмент груп“; Елијас Згеиб, главен извршен директор на „Емирејтс инвестмент груп“ и Антон ел Зогби, потпретседател на „Ал Бата груп“. На средбата присуствуваше и амбасадорот на Република Македонија во Обединетите Арапски Емирати, Абдулкадар Мемеди.

– Особено значаен резултат од средбата е склучувањето меморандум за соработка, со кој поставуваме основа за понатамошно поврзување, развивање партнерства и конкретни активности во насока на привлекување инвестиции – соопштија од Општина Гази Баба.

Оттаму додаваат дека во фокусот на разговорите биле економските потенцијали и развојните можности на Општина Гази Баба, со акцент на промоцијата на индустриската зона Северна обиколница, како простор со значителен потенцијал за нови инвестиции, отворање работни места и поттикнување на стопанскиот развој.

– Оваа средба е важен чекор кон создавање нови меѓународни партнерства и афирмација на Гази Баба како општина со отворени можности за инвестирање, развој и напредок. Соработката продолжува. Во периодот што следува ќе работиме на конкретизирање на договорените активности и на претворање на можностите во реални инвестиции и проекти.