Сребро за Мила Србиноска и Македонија на европското првенство во хип-хоп

Овој успех претставува продолжение на нејзината импресивна меѓународна кариера. Мила Србиноска веќе е препознатливо име на македонската и светската хип-хоп сцена, а во 2024 година ја освои и светската шампионска титула во хип-хоп. Новиот медал од Австрија дополнително ја потврдува нејзината конзистентност и припадност кон самиот европски и светски врв

Македонската танчарка Мила Србиноска, членка на танцовиот клуб „Брејк а лег“ од Скопје, освои сребрен медал на ИДО Европското првенство во ол стајл бетлс, кое се одржува од 1 до 7 јуни 2026 година во Клагенфурт, Австрија. Во исклучително силна конкуренција составена од најдобрите европски батл танчари, Србиноска успеа да стигне до големото финале и да ја освои титулата европски вицешампион, уште еднаш потврдувајќи го својот статус на една од најуспешните танчарки во уличните танцови дисциплини.

Овој успех претставува продолжение на нејзината импресивна меѓународна кариера. Мила Србиноска веќе е препознатливо име на македонската и светската хип-хоп сцена, а во 2024 година ја освои и светската шампионска титула во хип-хоп. Новиот медал од Австрија дополнително ја потврдува нејзината конзистентност и припадност кон самиот европски и светски врв.

Сребрениот медал претставува голем успех и за танцовиот клуб „Брејк а лег“, како и за македонската репрезентација, кои со години успешно ја претставуваат Македонија на најзначајните европски и светски танцови натпреварувања.

„Мила повторно покажа дека е една од најдобрите танчарки во Европа. Сребрениот медал на Европското првенство е огромен успех за неа, за нашиот клуб и за Македонија. Особено радува фактот што таа континуирано се наоѓа меѓу најдобрите на светот и Европа. Горди сме на нејзината посветеност, работа и карактер кои ја доведоа до уште еден голем резултат“, изјави Трајче Петковски од „Брејк а лег“.

ИДО Европското првенство во хип-хоп, попинг, брејкинг и ол стајл бетелс ги обединува најдобрите танчари од цела Европа и важи за едно од најзначајните и најпрестижни натпреварувања во уличните танцови дисциплини.

Македонската репрезентација продолжува со своите настапи и во наредните денови од шампионатот, каде што повеќе македонски танчари ќе се борат за нови финалиња и медали.

Со овој резултат, Мила Србиноска и „Брејк а лег“ уште еднаш потврдија дека Македонија има свое заслужено место меѓу најдобрите европски танцови нации.