Србија нема да воведе визи за руските граѓани, дециден е Вучиќ

Претседателот на Србија, Александар Вучиќ, изјави дека не станува збор дека ќе се донесе одлука со која Србија ќе воведе визен режим за граѓаните на Руската Федерација.

„Прв пат слушам за нешто такво“, рече Вучиќ во емисијата „Ќирилица“ на ТВ Прва.

Вучиќ рече дека ја повикал претседателката на Собранието, Ана Брнабиќ, за да ја праша дали има такво барање во парламентарната постапка, што таа го демантираше

„Има многумина кои очекуваат поддршка од Руската Федерација пред изборите и се обидуваат да кажат најлошо за нас на кој било можен начин. Нема сомнение за тоа, ниту пак ќе се донесе таква одлука. Дури и да ја донесат, таа веднаш ќе биде тргната“, рече Вучиќ.

Тој објави дека на Видовден, 28 јуни, како сигнал за помирување и единство, ќе донесе одлуки за помилување на некои од неговите политички соперници, поканувајќи ги да поднесат барања и петиции во наредните денови за да бидат земени предвид.

Вучиќ, исто така, објави дека за десет дена ќе биде ставен во функција порталот „Кој си бре ти“ за да се читаат забелешките на граѓаните.

Претходно вчера, портпаролот на рускиот претседател, Дмитриј Песков, изјави дека одлуката на Србија за укинување на безвизниот режим со Русија не може да биде еднострана, без реципрочни мерки.