Современите патишта бараат нови знаења, се интегрираме во европските текови

По 59 години постоење, Друштвото за патишта на Република Македонија станува членка на Европската асоцијација за асфалтни коловози (ЕАПА). Свеченото потпишување на пристапницата ќе се одржи денеска, на Градежниот факултет во Скопје, во присуство на претставници на институциите и на инженерската фела.

Претседателот на Друштвото, проф. д-р Горан Мијоски, оценува дека членството претставува значаен стручен исчекор, особено во период кога се реализира во земјава голем инвестициски циклус во патната инфраструктура и се градат шест автопатски делници.

– Не можеме да градиме современи патишта со знаења од деведесеттите години. Изградбата на модерна инфраструктура мора да се темели на современите европски знаења, технологии и стандарди. Членството во ЕАПА ќе придонесе за развој на струката, европска соработка и за интегрирање на македонското патно инженерство во европските стручни текови – истакнува Мијоски.

Тој посочува дека зачленувањето доаѓа во пресрет на 60-годишнината од основањето на Друштвото, која ќе се одбележи следната година, и ќе овозможи поблиска соработка со европската научна и стручна заедница, како и размена на знаења, искуства и иновации.

На свеченоста се предвидени обраќања на претставниците на Градежниот факултет, Комората на овластени архитекти и овластени инженери, ЈП за државни патишта, ЕАПА и Министерството за транспорт.