Естонскиот премиер Кристен Михал денеска повика на преземање неопходни чекори за затворање на источната граница на Естонија со Русија, по обидот за подметнување пожар во компанија за производство на беспилотни летала – чин што им се припишува на руските разузнавачки служби.
Според јавниот сервис ERR, се очекува границата да биде затворена во декември.
Вчера беа приведени осум државјани на Латвија по обид за упад во објектите на компанијата „Threod Systems“ во Виимси, северно од главниот град Талин.
Според извештаите, групата имала намера да предизвика експлозија и да ја запали зградата на компанијата; фирмата, меѓу другото, произведува извидувачки и борбени беспилотни летала со голем дострел.
Естонската служба за внатрешна безбедност (KAPO) соопшти дека нападот бил извршен по налог на руската воена разузнавачка агенција, ГРУ.
Танјуг АП/Герт Ванден Вајнгарт
Михал изјави дека разговарал за можното затворање на естонско-руската граница со министерот за внатрешни работи Игор Таро и побарал од него – во соработка со Канцеларијата на Владата – да ги подготви потребните мерки.
„Ако Русија продолжи со своите хибридни операции во Естонија – а знаеме дека руските разузнавачки служби ги користат граничните премини за да вршат влијание врз луѓето – мораме да бидеме подготвени да ги намалиме ризиците со кои се соочуваме“, рече тој.
Естонија моментално има три отворени гранични премини со Русија, кои се користат и за пешачки и за товарен сообраќај. Министерот Таро изјави дека следната недела Владата ќе разговара за затворање на сите патни гранични премини меѓу Естонија и Русија, со важност од 1 декември.
Тој додаде дека во наредните денови Владата ќе одлучи дали оваа мерка ќе биде привремена или трајна.
Министерството за надворешни работи преку објава на социјалната мрежа X соопшти дека границата ќе биде затворена почнувајќи од 1 декември.
