„Следбеник на Коста Кецмановиќ“ се закани дека ќе дига во воздух училишта во Сплит

Бран јавувања за бомби ги погоди училиштата низ Хрватска вo четвртокот изутрина. Десетици училишта во Пула, Карловац, Сплит и во Каштела добија заканувачки е-пораки, поради што учениците и наставниците беа итно евакуирани, додека полициските службеници вршат детални проверки во сите простории за да ја утврдат веродостојноста на пораките.

Особено вознемирувачка е пораката што ја добија сплитските средни училишта, во која се споменува и малолетниот убиец од Србија, Коста Кецмановиќ. Во неа се наведува дека се поставени рачно изработени смртоносни експлозиви, како оние што ги потресоа Париз, Истанбул, Лондон и училиштата низ целиот свет. Се додава дека ќе ги активираат ученици, кои ќе се разнесат себеси и целото училиште.

– Крв ќе тече по скалите, родителите ќе ја газат додека доаѓаат да ги бараат своите најблиски. И нема да најдат никого. Јас ги следам стапките на Коста Кецмановиќ, тој не беше луд, тој беше скршен… и јас сум скршен… и сите ние што сме тука сме скршени – се додава во е-поштата, пренесува Директно.хр.