Семејство за малку избегна смрт во земјотресот во Колумбија, во паника гледаа како се урива нивната куќа/ВИДЕО

Лилијана Перез Окампо и нејзиното семејство за малку избегнаа катастрофа кога силен земјотрес со јачина од 7,4 степени ја погоди западна Колумбија. Драматичните снимки споделени на социјалните мрежи ги покажуваат како бегаат од својот дом неколку моменти пред да се сруши.

Снимките што кружат на социјалните мрежи го покажуваат интензитетот на потресите. Улицата и тротоарот видливо се движат додека куќата зад семејството почнува да се урива. Во еден момент, се појавува млад човек, губејќи ја рамнотежата и борејќи се да остане на нозе.

Лилиана, мајка на четири деца, изјави за Би-Би-Си дека семејството првично не сфатило дека е во сериозна опасност.

„На почетокот мислевме дека е само благ земјотрес, што е вообичаено во Колумбија. Но, кога поминаа повеќе од 30 секунди и сè сè уште се тресеше и стануваше посилно, сфативме дека е многу силен земјотрес“, рече таа.

Colombia 🇨🇴 pic.twitter.com/sXExQgypRK

— Noelia Belén Izarza 🇻🇪🇺🇸 (@noeliaizarza) August 10, 2026

Нејзините две помлади деца беа во училиште во времето на земјотресот, а целото семејство заврши неповредено.

– На крајот, материјалните работи можат да се надоместат. Најважното нешто е животот, а ние го спасивме – рече Лилијана.

Земјотрес со јачина од 7,4 степени ја погоди Колумбија во понеделник, а градовите во областа позната по производство на кафе претрпеа најтешки последици. Голем број згради беа оштетени или уништени, додека болниците и другите критични објекти беа меѓу погодените.

Спасувачките екипи сè уште ги пребаруваат урнатините, надевајќи се дека ќе пронајдат преживеани. Според најновите бројки, најмалку 224 лица загинаа, додека се стравува дека конечниот број би можел да биде уште поголем.

Колумбискиот геолошки завод процени дека ова бил најмоќниот земјотрес што ја погодил земјата во 21 век. Епицентарот бил на длабочина од околу 107 километри, а по главниот потрес следеле голем број последователни потреси.

Во спасувачката операција биле вклучени припадници на службите за итни случаи, полицијата и армијата, на кои им се придружиле и граѓани во потрагата по луѓе кои можеби се заробени под урнатините.