Седум локални манифестации посветени на домашната храна, земјоделското производство, руралната жена, задругарството, лозарството и на локалните традиции ќе добијат финансиска поддршка од Министерството за земјоделство.
Договорите за техничка поддршка за организирање локални манифестации и саеми од областа на земјоделството и руралниот развој се во вкупна вредност од 1.048.509 денари (17.048 евра).
Парите, како што информираат од Министерството за земјоделство, се доделени по спроведен јавен повик, на кој пристигнаа 26 предлози.
– Домашното производство не се зајакнува само со зголемување на произведените количини. Важно е производот да биде препознаен, соодветно вреднуван и да го пронајде својот пат до потрошувачите. Локалните манифестации и саеми ја создаваат токму таа врска, односно ги доближуваат производителите до купувачите, овозможуваат размена на знаења и искуства и внесуваат нова економска енергија во руралните средини – изјави министерот за земјоделство, Борче Серафимовски, по потпишувањето на договорите.
Поддршка за организирање манифестации добија: Здружението за рурален и регионален развој „Блесок“ од Радовиш, за манифестацијата „Од зрно до погача”; Земјоделската задруга „Шари“ од Тетово, за „Ден на задругите 2026“; Здружението за земјоделци „Современо земјоделство“ од Битола, за „Рурална жена – силата на Пелагонија“; Здружението за заштита, промоција и едукација за храна „Слоу фуд Водно“ од Скопје, за „Храна за сите“; Здружението за негување и развој на винската култура, винскиот туризам и производите од грозје „Винотек” од Кавадарци, за „Тиквешија плодна лоза благородна 2026“; Здружението на конвивиум „Слоу фуд Прилеп” од Прилеп, за „Корени и трпеза – рурална жена денес“ и Општина Кратово, за манифестацијата „Компиријада 2026“.
Од Министерството велат дека со поддршката на овој вид манифестации, се создава простор македонските земјоделски производи да допрат до повеќе потрошувачи, а руралните средини во поголем обем да ги искористат своите производствени, туристички и економски потенцијали.
