Руски танкер за гас кој лебди на отворено море 12 дена по украинскиот напад е закана за животната средина – повеќе европски земји бараат брза реакција на ЕК

Италија, Франција и седум други земји писмено до Европската комисија (ЕК) велат дека рускиот танкер за течен природен гас што моментално плови во Медитеранот претставува закана за животната средина и повикаа на брза акција по ова прашање.

Во писмото, до кое имаше пристап „Ројтерс“, се вели дека рускиот танкер претставува непосреден и сериозен ризик од голема еколошка катастрофа во средината на морскиот простор на Европската унија, пренесе агенцијата.

Руското Министерство за транспорт соопшти дека танкерот „Арктик Метагаз“, кој превезувал течен природен гас од арктичкото пристаниште Мурманск, бил нападнат на 4 март од украински поморски беспилотни летала лансирани од либискиот брег. Екипажот беше евакуиран и оттогаш напуштениот танкер неконтролирано плови во Средоземното Море.

Портпаролката на руското Министерство за надворешни работи, Марија Захарова, денес објасни дека „во моментот на евакуација на екипажот, во резервоарите на бункерот останале 450 тони тешко гориво, 250 тони дизел гориво и значителна количина природен гас“. Захарова објасни дека, според сегашното меѓународно право, примарната одговорност за решавање на ситуацијата со пловечки брод и спречување на еколошка катастрофа е на крајбрежните држави.