Роберт Де Ниро заедно со милиони Американци: „Трамп мора да биде запрен, време е да му се каже не“

Американскиот актер Роберт Де Ниро денес изјави дека е горд што стои зад движењето „Без кралеви“ и го критикуваше американскиот претседател Доналд Трамп на прес-конференција во Њујорк дека претставува закана за слободата и безбедноста.

„Го поддржувам ова движење 150 проценти“, рече Де Ниро, пренесува CNN. Тој го опиша Трамп како егзистенцијална закана за слободата и безбедноста.

„Тој мора да биде запрен сега“, рече актерот. Де Ниро ги критикуваше „непотребните војни“, како и политиките на Трамп за здравствената заштита, имиграцијата и економијата.

„Време е да им се каже „не“ на кралевите. Време е да му се каже „не“ на Доналд Трамп“, заклучи Де Ниро.

Илјадници протестни собири се во тек низ целите САД против политиките на американскиот претседател Доналд Трамп и неговата администрација наречени „Без кралеви“, пренесува Ројтерс.

Организаторите велат дека се планирани повеќе од 3.200 настани во сите 50 држави и се надеваат дека тоа ќе биде најголемиот еднодневен ненасилен протест во историјата на САД. Два претходни настани „Без кралеви“ привлекоа милиони демонстранти, а големи собири се одржуваат денес во Њујорк, Лос Анџелес, Вашингтон и градови во американската држава Минесота.