Губиме еден час сон и здравје, иако некои тврдат: Летното сметање на времето е благослов!

Истражувањата и мислењата на експертите покажуваат дека промената на времето има голем број негативни последици по здравјето на луѓето, првенствено поради нарушувањето на биолошкиот ритам.

Идеја која не ги донесе очекуваните резултати

Летното сметање на времето беше воведено во Германија во 1980 година, а подоцна и во други европски земји, со цел намалување на потрошувачката на енергија.

Сепак, таа цел не беше целосно постигната. И покрај ова, поместувањето на часовникот сè уште се спроведува, иако голем дел од јавноста е против тоа, наведува Tagesschau.

Според анкетата на Европската комисија од 2018 година, дури 84 проценти од испитаниците рекле дека се против продолжување на поместувањето на часовникот.

Експерти: Страда биолошкиот ритам страда

Научниците предупредуваат дека преминувањето на летно време има негативен ефект врз телото.

„Кога преминуваме на летно сметање на времето, стануваме еден час порано. Ова всушност го скратува нашиот сон“, објаснува истражувачката за спиење Ева Винебек од Универзитетот во Сари.

Таа додава дека телото не може едноставно да се адаптира.

„Не можеме едноставно да си легнеме порано бидејќи нашиот внатрешен часовник одредува кога ќе заспиеме“, вели Винебек.

Затоа многу луѓе се чувствуваат уморни и имаат тешкотии да се концентрираат во првите денови по промената на времето.

Повеќе несреќи и здравствени проблеми

Последиците не се само субјективни. Според истражувањата, бројот на сообраќајни несреќи се зголемува во деновите по поместувањето на часовникот, а е забележано и зголемување на срцевите удари.

„Ако телото е под стрес, здравствените проблеми се поверојатни“, предупредува Винебек.

Покрај тоа, недостатокот на сон е поврзан со поголем ризик од метаболички нарушувања како што е дијабетесот.

Постојат и различни мислења

Сепак, не сите експерти го делат потполно истото мислење. Докторот и експерт за спиење Дитер Кунц истакнува дека долгорочните ефекти од промената на времето не се доволно истражени.

Според него, промените во должината на денот, исто така, силно влијаат врз човечкото тело. Истражувањата покажуваат дека луѓето природно спијат помалку во лето отколку во зима, независно од часот.

„Човекот функционира различно во зима отколку во лето. Во оваа смисла, промената на времето може да биде адаптација на тие природни промени. Летното сметање на времето е благослов“, верува Кунц.

Постојаната летна варијанта не е решение

И покрај разликите во мислењата, повеќето експерти се согласуваат за едно нешто – постојаното летно сметање на времето не е добра идеја.

Причината е недостатокот на утринска светлина во текот на поголемиот дел од годината, што негативно влијае на внатрешниот биолошки часовник. Затоа, научните организации предлагаат трајно задржување на стандардното, т.е. зимско сметање на времето.