Коалицискиот партнер на Мелони: Не можеме да продолжиме да испраќаме пари и оружје во Украина

Италијанскиот заменик-премиер Матео Салвини вети дека ќе се спротивстави на понатамошната финансиска и воена помош за Украина, откако беше реизбран за лидер на десничарската популистичка партија „Лига“.

Говорејќи на партискиот конгрес, Салвини изјави дека неговиот реизбор му дава мандат да ја преиспита поддршката на Италија за Украина, делувајќи од внатрешноста на владата.

„Не можеме да продолжиме да испраќаме пари и оружје во Украина“, изјави Салвини, ветувајќи дека ќе се залага за ставот на „Лига“ за време на владините дискусии.

Делегатите го поздравија неговиот говор со аплауз, по што го реизбраа за лидер на партијата со 465 гласа, при што тој го победи својот главен противкандидат, Масимо Гараваља.

Салвини поднесе оставка од функцијата лидер на „Лига“ пред речиси две недели, поради внатрешни несогласувања околу политичката насока на партијата и зголемената конкуренција од страна на екстремната десница.

Партијата се соочува со предизвик од „Национална иднина“, нова партија основана од поранешниот генерал Роберто Ваначи, која според анкетите на јавното мислење веќе ја има надминато „Лига“.

Салвини е под притисок да спречи гласачите да преминат кон оваа ривалска партија.

Под водство на премиерката Џорџа Мелони и десничарската коалиција од три партии која управува со земјата во последните четири години, Италија остана цврст поддржувач на Украина, како во рамките на Европската унија, така и во НАТО. Салвини, чија партија „Лига“ е помал коалициски партнер, зазеде попроруски став, поради што се размислува различно од Мелони во однос на поддршката за Киев, посочува агенцијата ДПА.