Републикански сенатор: Нејасни се целите на војната во Иран, НАТО сојузниците не се кукавици

Републиканскиот сенатор Том Тилис изјави дека целите на САД во војната со Иран не се јасно дефинирани, критикувајќи ги најавите на американскиот претседател Доналд Трамп за можноста за „намалување“ на интензитетот на војната и повлекување на САД од НАТО.

Тилис оцени дека ваквите потези би можеле да ги загрозат сојузниците и интересите на САД.

Тој во интервју за ABC News рече дека администрацијата на претседателот Доналд Трамп не соопштува јасно што сака да постигне во војната со Иран, која влегува во својата четврта недела.

„Која е целта, главната цел? Не знам, и мислам дека тоа е голем проблем“, рече сенаторот од американската држава Северна Каролина, оценувајќи дека сегашната операција е „нејасна“ и дека не е дефинирана долгорочна стратегија.

Тој, исто така, ги критикуваше најавите на Трамп за можно намалување, или повлекување, од конфликтот пред решавањето на прашањето за Ормутскиот теснец, предупредувајќи дека таков потег би ги загрозил американските партнери во регионот.

„Имаме голем број сојузници чии економии зависат од отворањето на Ормутскиот теснец. Не можете одеднаш да се повлечете и да очекувате другите да ги сносат последиците“, рече Тилис.

Сенаторот, исто така, одговори на критиките на Трамп кон сојузниците од НАТО, кои претседателот ги нарече „кукавици“ затоа што не помогнале доволно за отворање на теснецот, истакнувајќи дека не биле консултирани за операцијата.

„Не мислам дека се кукавици. Не мислам дека биле консултирани и би имал иста реакција да бев на нивно место“, рече Тилис.

Тој ја отфрли можноста американскиот претседател сам да одлучи за повлекувањето на САД од НАТО.

„Претседателот не може да ги повлече Соединетите Американски Држави од НАТО. Американските животи се спасени благодарение на тој сојуз, а без него ќе беа изгубени“, нагласи Тилис.

Тилис, исто така, изјави дека, и покрај критиките, поддржува одредени активности на администрацијата, како што се претходните напади врз иранските нуклеарни постројки. Американскиот сенатор, исто така, изјави дека има „здрав однос“ со Трамп, но исто така нагласи дека ќе ги критикува лошите постапки.

„Не се обидувам да ги поткопам републиканците, туку постапките што би можеле да им го отежнат освојувањето на изборите во ноември“, заклучи Тилис.